airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Aningaasanoorneq/ludomani 

Aningaasanoornermik pinngitsuuisinnaannginnerup (aningaasanoorajunnerup) suunerata ataatsimut paasineqarnissaanut peqataanissaq matumani siunertaavoq. Paasissutissanik sukumiinerusunik pissarserusukkuit nittartakkami ilisimasanik katersivimmi imal.: www.peqqik.gl-imi taakku pissarsiassaapput.

Aningaasanoorneq soorlu nallukattarneq bingornerlu amerlasuunut aliikkusersornermut nuannisarnermullu attuumassuteqarput, allalli pissanganeq misiginiarlugu imal. inuttut ajornartorsiutit allamut saatinniarlugit aningaasanoortarput. Inuit ilaannut aningaasanoorneq uerinarsinnaavoq pinngitsoorneqarsinnaajunnaarsinnaallunilu.

Ludomani tassaavoq aningaasanoornermik pinngitsuuisinnaannginneq. WHO-mit ima nassuiarneqarpoq: ”inuttut inooqataanermi, sulinermi ilaqutariinnermilu naleqartitat pisussaaffiillu akigalugit pinnguaatinik atuinermi akornuteqarneq inuup inuuneranik aqutsisoq”.

Aningaasanoorajuttunngoriartorneq pissutsinik assigiinngitsunik amerlasuunik kingornussanit avatangiisiniillu sunnerneqarpoq, ukiut, suiaassuseq inuttullu atukkatigut inissisimaneq apeqqutaatinnagit atituumik eqquisartoq. Aningasanooriaaseq ajornartorsiutitaqanngitsumik pinnguaatinik atuinermiit pinngitsuuisinnaajunnaarnermut assigiinngiiaarpoq. Ukiut ingerlanerini ajornartorsiuteqannginnermiit navianaatilimmik atuinermut, ajornartorsiutitalimmik atuinermut aningaasanoorajuttunngornermullu ineriartorajuppoq, ilaannulli pilertornerusarluni.

Navianaatilimmik ajornartorsiutitalimmillu atuinerup aningaasanoorajuttunngornerullu ilisarnaataat makkuupput:

Ajornartorsiutitalimmik pinnguaatinik atuineq. Inuup piffissamik aningaasanillu atuinini annertusivaa. Pinnguaat timikkut tarnikkullu nukissanik atuisitsivoq. Eqquisinnaaneq ukkanneqarpoq. Aningaasanoorneq eqqarsaatersuutaavoq pilersaarusiugaallunilu, privatimik inuunermut sulinermullu akuliunnerunani.

Navianaatilimmik atueriaaseqarneq. Inuup pinnguaatinik samminniinnaleraluttuinnarnera piffissamillu aningaasanillu atuigaluttuinnarnera. Aningaasanoorneq eqquisinnaanerlu paasiniaqqissaarneqarput naliliivigineqarlutillu. Aningaasanoorneq timikkut tarnikkullu nukissanik piumasaqaatitaqarpoq avatangiisaasullu pissusilersornerup allanngornera malugaat.

Aningaasanoorajunneq. Aningaasanoorajuttoq aningaasanoornermik pingitsuuisinnaanngilaq. Aningaasanoorneq imal. aningaasanoornissamik eqqarsaateqarneq piffissap aamma /imal. eqqarsaatit ilarujussuannik tigusivoq. Ikinngutit, ilinniagaq, suliffik sunngiffimmilu soqutigisat tunulliunneqarput. Amerlanertigut akiitsut qaffassapput.

Ass. timimut, tarnimut pissusilersornermullu kinguneri aningaasanoorajunnermut atassuteqarput. Taakku tassaapput ass. timikkut ersiutit soorlu uummammik tillerulutitsineq, ilungersualerneq/stress, sinissaaleqineq aammali imminut toqunnissamik eqqarsarneq, ukkassisinnaanikkut ajornartorsiuteqarneq, eqqarsartaatsikkut najuutinnginneq inoqatinullu akuliusimannginneq.

Ersiutit ajornartorsiutitut allatut paasineqarajupput taamaammallu aningaasanoorajunneq paasiuminaattarpoq pinngitsuuisinnaannginnertullu ersinngitsutut isigineqarluni.

Filmimi aningaasanoorajuttuujunnaarnissamut aqqummi aningaasanoorajunneq pillugu annertunerusunik ilikkagaqarsinnaavutit:
 
 
Aningaasanoorneq (gambling) – ass. timersornermi angusanik eqquiniaanerit, kiliortugassat nallukattarnerlu pinnguaatinillu pinnguarneq (gaming)- qarasaasiakkut pinnguaatinut –atortorissaarutinullu tamatumunnga atorneqarsinnaasunut assigiinngitsunut ataatsimut taaguutigitineqartumut immikkoortinneqartarput

Aningaasanoorajuttuuit? Uani imminut misiligit.