airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Siusinaartumik iliuuseqarneq suua? 

Naartusunut ilaqutaasunullu siusinaartumik iliuuseqarneq (Siusinaartumik iliuuseqarneq) naartusunut immikkut ikiortarialinnut suliniutitut 2007-imi aallartippoq. Ilaqutariit sumiginnaanissamik pinaveersaarnissaat anguniarlugu suliniut pilersinneqarpoq. Siusinaartumik iliuuseqarneq 2010 tikillugu kommuneni tamani eqqunneqarpoq.

Siusinaartumik iliuuseqarnerup siunertaraa ilaqutariinni angajoqqaanngortussanik nukittorsaanerit, sumiginnaanermik pinaveersaartitsineq, sumiginnaanerup meeqqamut, ilaqutariinnjt inuiaqatigiinnullu sunniutai pinaveersaartinniarsaralugit.

Siusinaartumik iliuuseqarnerup iluani, ilaqutariinnut sullissinermi, susassaqarfiit akimorlugit suleqatigiinnerit suliami qitiupput. Sullissisooqatigiit tassaapput ilinniagaqartut susassaqartut soorlu ernisussiortut, meeqqerisut, inunnik sullissisut, ilaqutariinnut siunnersortit allallu. Sullissisooqatigiit Siusinaartumik iliuuseqarnermut ilaqutariinnik misissuisarput, pilersaarusiorlutik ilaqutariinnullu naleqquttunik neqeroorusiorlutik. Sullissisooqatigiit ataasiakkaat qanoq ittuuneri apeqqutaalluni, qaammammut ataaseriarlutik marlorloriarlutilluunniit naapeqatigiittarput.

Neqeroorutini suliassat isumagisassallu tigussaanerusut inunnik isumaginninnerup iluani isumagineqartarput, naartunermiillu meeqqallu marlunnik ukioqalernissaanut iliuuseqarnerit peqqinnissaqarfiup neqeroorutigissallugit.

Sullissisooqatigiit kommunemi aqutsisooqatigiinnut peqqinnissaqarfimmiit inunnillu isumaginnittoqarfimmiit aaliangiisinnaassuseqartunut attuumassusernissaat anguniagaavoq.

Illoqarfigisami aqutsisunit taperserneqarnissaq, sullissisooqatigiit tunngaviusumik susassaqarfiit akimorlutik suleqatigiinnissaat aqunneqarnissaallu kiisalu Allorfimmut Pinngitsuuisinnaajunnaarnermik Paasisimasaqarfimmut ataavartumik attaveqarnissaq, aqutsisooqatigiit akisussaaffigaat.

Siusinaartumik iliuuseqarnerup qitiutitaa tassaavoq meeraq qitiutinneqartoq aammalu ilaqutariinnit suleqataatitsineq suliamik pingaartitsineq, tatigeqatigiinnermik, ataqqeqatigiinnermillu takutitsisoq.

Ilaqutariit Siusinaartumik iliuuseqarnermut ernisussiortup innersuuttagaani angajoqqaajusut ilaatigut ukuninnga atugaqartuusarput:

• Hash, imigassaq oorinoornerluunniit ajornartorsiutigippatigit
• Inuusuttuaraappata (13-17 akornanni ukiullit)
• Eqqarsartaatsikkut piginnaasaat annikippata
• Allanik meeraqarpata angerlarsimaffiup avataannut inissitanik
• Sumiginnagaasimagunik kingunerlutsitsigunillu
• Kinguaassiuutitigut atornerlugaasimappata