airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Aanngajaarniutinik ajornartorsiuteqartut katsorsarneqarnissaminnut sapiinneruleriartortut amerliartorput

Ukioq kingulleq imigassamik, hash-imik aningaasanoornermillu atornerluisut akeqanngitsumik katsorsartinnissamut neqeroorut atorluarpaat, amerlanerit iluatsittumik naammassinnillutik. Tamanna Allorfiup ukiumoortumik nalunaarusiaata 2019-imoortup takutippaa.
7. maj 2020
Allorfik nuna tamakkerlugu atornerluinermik katsorsaanissamik neqerooruteqartoq ukiuni sisamani ingerlareerpoq, ukiullu tamaasa Innuttaasut katsorsartikkusullutik Allorfimmut saaffiginnittartut amerliartorput. 2019-imi Innuttaasut 668-it katsorsartissimapput, ukiup siulianut sanilliullugu amerleriarlutik:

-Tamanna ineriartorneruvoq ajunngitsoq. Innuttaasut taama amerlatigisut ajornartorsiuteqarnertik takusinnaallugu katsorsartikkusullutik saaffiginnittarnerat sapiissuseqarneruvoq, ikiorneqarnissamik qujarussisut katsorsartittartut assut ataqqivagut,” Allorfimmi pisortaq, nakorsaq Birgit Niclasen oqarpoq.

Inuusuttut amerlanerit - arnat amerlanerit
Ukioq kingulleq katsorsartikkusullutik nalunaarsimasuni eqimattat amerlanerpaat 25-t 34-llu akornanni ukioqarput, taakkunannga arnat angutinit amerlanerulaarlutik.

Imigassamik pinngitsuuisinnaajunnaarnermik ajornartorsiuteqarneq ajornartorsiutaanerpaavoq. Katsorsarneqarnissamik innersuunneqartut tallimaagaangata sisamat tassa 73 %-it annertuumik imigassamik ajornartorsiuteqartarput, imminerminnik innarliisinnaasumik atuisuullutik imaluunniit imigassamik pinngitsuuisinnaajunnaavissimasuusarlutik.

Taamatuttaaq hashimik atornerluineq ajornartorsiutaavoq – pingaartumik angutini inuusuttuni. Pinngitsuuisinnaajunnaarnermik katsorsartittartut affangajaat angutit 44%-ii hash-imik pinngitsuuisinnaajunnaarnermik ajornartorsiuteqarput annertuumilluunniit pinngitsuuisinnaajunnaarsimasuusarlutik. Tamanna arnani aamma atuuppoq, tassa arnat katsorsartittut 32 %-ii hashimik pinngitsuuisinnaajunnaarsimasuusarput.

Amerlanerit katsorsartinneq naammassigaat
Katsorsartittut tallimaagaangata sisamat 2019-imi katsorsartinnerminnik naammassinnipput, ukiup siulianiit amerlanerulaarlutik.

Tamanna innuttaasunut ataasiakkaanut angusaq annertuvoq, atornerluinermiit aniguineq, tamannalu aamma Allorfimmut ajugaasimaarnarpoq.

-Nuannaarutigisaqaarput Innuttaasoq atornerluiunnaartoq inuulluaqqugaangatsigu, minnerunngitsumik nuannaarutigaarputtaaq inuusuttut amerlanerit katsorsartinnerminnik naammassinnittarnerat,” Birgit Niclasen oqarpoq. Taassuma innersuuppai ukioqatigiiaat 15-it 24-llu akornanni ukiullit.

Inuusuttuni sisamaasunit ataasiinnaq katsorsartinnermini naammassinnissimanngitsoq 2019-mi erserpoq. Ukiup siuliani 34%-iisa katsorsartinnertik naammassisimanngikkaat.

-Eqimattat meeqqat inuusuttullu katsorsaariaatsimik pitsaanerusumik neqerooruteqarfiginiarpagut, ajoraluartumilli nualluut corona pissutigalugu meeqqanik inuusuttunillu katsorsaariaatsimik aallartitsinissarput kinguartittariaqarparput, takutissaarli Birgit Niclasen nassuiaavoq.

Najukkami katsorsartinneq
Allorfiup pilersinneqarneranit ukiut sisamat ingerlaneranni najukkami katsorsartinneq pitsanngorsaavigineqarnikuuvoq, taamaalilluni katsorsartittut tallimaagaangata sisamat najukkaminni katsorsartittarput. Ukiup siualianut sanilliullugu amerlerialaarlutik. Ukioq manna 2020-mi najukkami akeqanngitsumik aanngajaarniutit pillugit katsorsarneqarnissamut illoqarfiit tamaasa neqerooruteqarfigissavagut.

Ikioqatigiittariaqarneq
Katsorsartinneq iluatsissappat susassaqartut arlallit ataatsikkut ikioqatigiittariaqarnerat pisussaaffiliivoq. Suleqatigiinneq taanna innuttaasup katsorsartinnerani ingerlanneqartussaavoq, makkuninngalu ilaqarluni soorlu suliffeqarneq, aningaasaqarneq, ineqarneq, peqqinnissaq imaluunniit alla aanngajaarniutinik atornerluinermut kalluaasoq. Taamaattumik Allorfik kommunini aamma peqqinnissaqarfimmi sulisunik suleqateqarnissamik pisussaaffiliivoq. Ajoraluartumik Ukiumoortumik nalunaarusiap takutimmagu suleqatigiinneq pitsanngorsarneqartariaqartoq, tassami innuttaasut affangajai taamaallaat katsorsartereernerup kingorna qanoq iliornissamik pilersaarusiuunneqarsimapput. Pilersaarusiorsimagaanni innuttaasoq katsorsartereernermini aanngajaarniutinik ingalassimaarinnissinnaaneranik kaammattorneqarsinnaammat.

- Taamaammat ukioq manna 2020-mi tamatuma ukkanneqarnerunissaa kissaatigaarput Birgit Niclasen naggasiivoq.

Annertunerusumik paasisaqarusunnermi
Allorfimmi pisortaq, Birgit Niclasen attavigineqarsinnaavoq
E-mail: bivn@allorfik.gl
Telefon: 34 66 52