airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Aningaasanoorneq/ludomani 

Aningaasanoornermik pinngitsuuisinnaannginnerup (aningaasanoornermik ajornarnartorsiuteqarnerup) suunerata ataatsimut paasineqarnissaanut peqataanissaq matumani siunertaavoq. Paasissutissanik sukumiinerusunik pissarserusukkuit nittartakkami ilisimasanik katersivimmi imal.: www.paarisa.gl-imi taakku pissarsiassaapput.

Aningaasanoorneq soorlu nallukattarneq bingornerlu amerlasuunut aliikkusersornermut nuannisarnermullu attuumassuteqarput, allalli pissanganeq misiginiarlugu imal. inuttut ajornartorsiutit allamut saatinniarlugit aningaasanoortarput. Inuit ilaannut aningaasanoorneq uerinarsinnaavoq pinngitsoorneqarsinnaajunnaarsinnaallunilu.

Ludomani tassaavoq aningaasanoornermik pinngitsuuisinnaannginneq. WHO-mit ima nassuiarneqarpoq: ”inuttut inooqataanermi, sulinermi ilaqutariinnermilu naleqartitat pisussaaffiillu akigalugit pinnguaatinik atuinermi akornuteqarneq inuup inuuneranik aqutsisoq”.

Aningaasanoornermik ajornartorsiuteqaleriartorneq pissutsinik assigiinngitsunik amerlasuunik kingornussanit avatangiisiniillu sunnerneqarpoq, ukiut, suiaassuseq inuttullu atukkatigut inissisimaneq apeqqutaatinnagit atituumik eqquisartoq. Aningasanooriaaseq ajornartorsiutitaqanngitsumik pinnguaatinik atuinermiit pinngitsuuisinnaajunnaarnermut assigiinngiiaarpoq. Ukiut ingerlanerini ajornartorsiuteqannginnermiit navianaatilimmik atuinermut, ineriartukkajuppoq, ilaannulli pilertornerusarluni.

Navianaatilimmik ajornartorsiutitalimmillu atuinerup aningaasanoornermillu ajornartorsiuteqalernerup ilisarnaataat makkuupput:

Ajornartorsiutitalimmik pinnguaatinik atuineq. Inuup piffissamik aningaasanillu atuinini annertusivaa. Pinnguaat timikkut tarnikkullu nukissanik atuisitsivoq. Eqquisinnaaneq ukkanneqarpoq. Aningaasanoorneq eqqarsaatersuutaavoq pilersaarusiugaallunilu, privatimik inuunermut sulinermullu akuliunnerunani.

Navianaatilimmik atueriaaseqarneq. Inuup pinnguaatinik samminniinnaleraluttuinnarnera piffissamillu aningaasanillu atuigaluttuinnarnera. Aningaasanoorneq eqquisinnaanerlu paasiniaqqissaarneqarput naliliivigineqarlutillu. Aningaasanoorneq timikkut tarnikkullu nukissanik piumasaqaatitaqarpoq avatangiisaasullu pissusilersornerup allanngornera malugaat.

Aningaasanoornermik ajornartorsiuteqarneq. Aningaasanoornemik ajornartorsiuteqartoq aningaasanoornermik pinngitsuuisinnaanngilaq. Aningaasanoorneq imal. aningaasanoornissamik eqqarsaateqarneq piffissap aamma /imal. eqqarsaatit ilarujussuannik tigusivoq. Ikinngutit, ilinniagaq, suliffik sunngiffimmilu soqutigisat tunulliunneqarput. Amerlanertigut akiitsut qaffassapput.

Assersuutigalugu timimut, tarnimut pissusilersornermullu kinguneri aningaasanoornermik ajornartorsiuteqarnermut atassuteqarput. Taakku tassaapput assersuutigalugu timikkut ersiutit soorlu uummammik tillerulutitsineq, ilungersualerneq/stressilerneq, sinissaaleqineq aammali imminut toqunnissamik eqqarsarneq. Taamatuttaaq ukkassisinnaanikkut ajornartorsiuteqarneq, eqqarsartaatsikkut naalliuuteqarneq inoqatinullu akuliusimannginneq.

Ersiutit ajornartorsiutitut allatut paasineqakkajupput taamaammallu aningaasanoornermik ajornartorsiuteqarneq paasiuminaattarpoq pinngitsuuisinnaannginnertullu ersinngitsutut isigineqarluni.

Filmimi aningaasanoornemik ajornartorsiutaarunnissamut ikaarsaarnermi aningaasanoornemik ajornartorsiuteqarneq pillugu annertunerusunik ilikkagaqarsinnaavutit:

 
 
Aningaasanoorneq (gambling) – assersuutigalugu soorlu timersornermi angusanik eqquiniaanerit, kiliortugassat nallukattarnerlu pinnguaatinillu pinnguarneq (gaming)- qarasaasiakkut pinnguaatinut –atortorissaarutinullu tamatumunnga atorneqarsinnaasunut assigiinngitsunut ataatsimut taaguutigitineqartumut immikkoortinneqartarput