airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Qanigisaasunut ikiuunneq 

Inunnut pinngitsuuisinnaajunnaarsimasunut qanigisaasut pisumut ajornakusooqisumut qanoq iliuuseqarnissamut isumassaarunneq nalorninerlu misigigajuppaat. Tamanna pissutigalugu qanigisaasunik katsorsaaneq neqeroorutaavoq.

Pinngitsuuisinnaajunnaarsimasunut qanigisaasut qanoq innerminnut tunngatillugu ilinniarsimasunik oqaloqateqarnissamik taamalu atugalinnik allanik naapitsinissamik pisariaqartitsigajupput, tamannalu Allorfiup katsorsaaviini qanigisaasutut katsorsartinnikkut pisinnaavoq. Qanigisaasunik ataasiakkaanik arlalinnilluunniit katsorsaasoqarsinnaavoq, katsorsaaneq arfineq marlunnik immikkoortortaqarpoq sapaatillu akunnerini arfineq marlunni ingerlanneqartarluni.

Ataasiakkaanik oqaloqateqarnermik aallarnerneqartarpoq, tassani qanigisaasup ajornartorsiutai oqaluuserineqartarput. Tamatuma saniatigut qanigisanut najoqqutassamut- ilinniartitsinermik, sungiusarnernik eqimattakkuutaarlunilu suliaqarnermik imalik saqqummiunneqassaaq.

Ilinniartitsineq pinngitsuuisinnaajunnaarnerup suuneranut tamatumalu qanigisaasunut qanoq sunniuttarneranut tunngassuteqarpoq. Tamatuma saniatigut qanigisaasut qanoq inissisimanerat pillugu ilinniartitsissutigineqartarpoq. Peqataasut ilinniartitaanikkut inummut pinngitsuuisinnaajunnaarsimasumut qanigisaanerup kingunerisaasa misigissutsikkut ajornakusoortitsisut oqaluuserinissaannut suliarinissaannullu periarfissinneqartarput.


Takussutissiissummi matumani qanigisaasunut najoqqutassap immikkoortuini sammisat takutinneqarput:

 

Sammisaq

Aallartitsinnani oqaloqatigiinneq

Inissisimanerit pillugu oqaloqatigineqarneq
Qanigisaanut najoqqutassamik saqqummiussivigineqarneq

Ilinniartitaanermi immikkoortoq siulleq

Qanigisavit aanngajaarniutinik atuinerata iluaqutitai ajoqutitaalu
Aappariinnermi nakuusernermik pitsaaliuineq

Ilinniartitaanermi immikkoortut aappaat

Aanngajaarniutit qanigisannut qanoq sunniuteqarnerannik paasiniaaqqissaarneq

Ilinniartitaanermi immikkoortut pingajuat

Illit nammineq inuunerpit naleqassusaata pitsanngortinnissaanik ukkassineq

Ilinniartitaanermi immikkoortut sisamaat

Attaveqatigiinnermik sunniuteqarluartumik pitsaasumillu sungiusarneq ilinniaruk

Ilinniartitaanermi immikkoortut tallimaat

Pissusilersornerup kissaatigisavit nukittorsarnissaa ilinniaruk

Ilinniartitaanermi immikkoortut arfernat

Aanngajaarniutinik sunnigaanikkut pissusilersornerup kingunerisa pitsaanngitsut sakkortusannginnissaat ilinniaruk

Ilinniartitaanermi immikkoortut arfineq aappaat

Naggasiineq katsorsartinnissamullu periarfissanik paasissutissinneqarneq

Innuttaasoq pinngitsuuisinnaajunnaarsimappat, qanigisaasut marluk qanigisaasutut katsorsartissinnaapput. Innuttaasup pinngitsuuisinnaajunnaarsimasup katsorsartinnissaa piumasaqaataanngilaq. Katsorsaaneq qanigisaasunut inersimasunuinnaq neqeroorutaavoq, siunissamili meeqqanut neqeroorutaasinnaanngussalluni.

Qanigisaasutut katsorsartinnissaq kissaatigigukku, najukkanni Allorfimmut imal. isumaginnittoqarfimmi sullissisunnut periarfissannik paasissutissiisinnaasumut saaffiginnissaatit.

Qanigisaasutut katsorsartinneq akeqanngilaq najukkannili kommunip katsorsartinninnut atatillugu angalanermut, ineqarnermut assigisaannullu aningaasartuutit isumagissavai.